76 ఏళ్ల వయసులోనూ కుర్రాడిలా డిప్స్ కొట్టిన నానా పాటేకర్.. వీడియో ఇదిగో!

బాలీవుడ్ సీనియర్ నటుడు నానా పటేకర్ తన ఫిట్‌నెస్‌తో మరోసారి అందరినీ ఆశ్చర్యపరిచారు. 76 ఏళ్ల వయసులో ఆయన జిమ్ లో ఎక్సర్ సైజులు చేస్తున్న దృశ్యాలు ప్రస్తుతం సామాజిక మాధ్యమాల్లో విపరీతంగా వ్యాపిస్తున్నాయి. ఈ వయసులోనూ ఆయన దృఢత్వం, క్రమశిక్షణ చూసి నెటిజన్లు ప్రశంసలు కురిపిస్తున్నారు.

ప్రముఖ ఛాయాగ్రాహకుడు, నిర్మాత అతుల్ కస్బెకర్ ఈ దృశ్యాలను తన ఇన్‌స్టాగ్రామ్ ఖాతాలో పంచుకున్నారు. ఇందులో నానా పటేకర్ ఒక బనియను, నిక్కరు ధరించి, మెడలో టవల్ వేసుకుని 'ట్రైసెప్ డిప్స్' వ్యాయామాన్ని ఎంతో సులువుగా చేశారు. ఆయన ఒకేసారి ఏకంగా 15 డిప్స్‌ను పూర్తి చేసి, చిరునవ్వుతో కెమెరా వైపు చూశారు.

ఈ దృశ్యాలను పంచుకుంటూ అతుల్ కస్బెకర్, "నానా సాహెబ్.. మీరు నా ఫిట్‌నెస్ లక్ష్యాలను మార్చేశారు. 76 ఏళ్ల వయసులో ఆయన 15 డిప్స్ చేశారు. నిజమైన దిగ్గజం" అంటూ కొనియాడారు. ఈ పోస్ట్ చూసిన నటీనటులు శిల్పా శెట్టి, రాహుల్ దేవ్‌తో పాటు ఎందరో అభిమానులు ప్రశంసల వర్షం కురిపిస్తున్నారు. "ఆయన అందరికీ స్ఫూర్తి", "నిజమైన బలం అంటే ఇదే" అంటూ కామెంట్లు పెడుతున్నారు. ఇటీవల 'ఓ రోమియో' చిత్రంలో పోలీస్ అధికారిగా కనిపించిన నానా పటేకర్, తన ఫిట్‌నెస్‌తో యువతకు ఆదర్శంగా నిలుస్తున్నారు.